Menings | Opinion > Onderhoude | Interviews > Afrikaans > Cancer.vive: Onderhoud met Janie du Plessis Cancer.vive: Onderhoud met Janie du Plessis

---

Nadine Petrick - 2011-09-16

 

Hoe het jy by Cancer.vive betrokke geraak?

Ek is nou al jare lank betrokke met borskankerprojekte en het toe gesien hoe groot die probleem van kanker eintlik is en watse reuse-verskil bewusmaking in gemeenskappe kan maak. ’n Hele klomp van die dames wat in die vorige projekte saam met my betrokke was se mans het ook kanker gekry en ons het toe besluit om ons projek uit te brei en nie eksklusief te wees nie, en so het ons toe besluit om Cancer.vive te begin. Ons tema is die “skaam kankers” – prostaat-, testikulêre, bors-, servikale en kolonkankers.

Benewens die motorfietstoer deur die land, watter ander maniere gebruik Cancer.vive om bewusmaking te skep of fondse in te samel?

Ons projekte loop deur die jaar. Elkeen van die deelnemers dra by met fondsinsameling. Ons het ook ’n donasieblad op ons Cancer.vive-webblad en die publiek is baie ondersteunend en dit maak ’n groot verskil. Baie van die dames lewer praatjies en word uitgenooi na funksies in hulle areas. Ander dames doen gholfdae, middernag-pretlope en musiekvertonings. Ek is ’n motiveringspreker en praat oor meer as net kanker: ek sluit die hele proses van “oor begin” in en hoe jy ná ’n terugslag weer op jou voete kan kom.

Maak jou profiel as bekende persoonlikheid ’n groot verskil as dit by kankerbewusmaking kom?

Ek hoop so. Ek glo darem so. As ek in die gemeenskappe kom, kry ek nogal baie mense wat na my toe kom en hulle stories spontaan met my deel. Dis nie altyd maklik om so voor mense oor jou moeilike ervarings te praat nie, maar ek weet hoe gesond dit eintlik is. Daar is ongelooflike verhale daar buite van mense wat kanker oorleef het en dan hulle verhale van hoop ná die tyd deel met die mense in hulle gemeenskappe. Dis altyd die gewone mense wat ’n mens die meeste inspireer. Ek’t al baie keer die trane moes terugsluk voor gehore as ek oor my eie ervarings gesels, maar daar is altyd iemand wat ná die tyd na ’n mens toe kom en dankie sê – en as ek net in één mens se lewe ’n verskil kan maak, is dit vir my genoeg. Ons behoort sowat 30000 mense persoonlik te raak met ons projek hierdie jaar.

Die Cancer.vivers het almal baie inspirerende verhale. Wie of wat inspireer jou?

Gewone mense inspireer my. Mense wat ten spyte van die mees ongelooflike uitdagings oorleef, hulleself geestelik verryk daardeur en dan weer oorwin – dit inspireer my. Mense soos Lance Armstrong.

Hoe vier jy die lewe?

Ek vier die lewe met stilte en met tyd. Dit is die moeilikste en kosbaarste ding in my lewe en iets waaraan ek elke dag werk.

 

<<< Lees Cancer.vive se onlangse persverklaring hier.