Hierdie is die LitNet-argief (2006–2012)
Besoek die aktiewe LitNet-platform by www.litnet.co.za

This is the LitNet archive (2006–2012)
Visit the active LitNet platform at www.litnet.co.za


 
Menings | Opinion > Onderhoude | Interviews > Afrikaans > Fanie Viljoen gesels met Maggie Marx

Fanie Viljoen gesels met Maggie Marx


Maggie van Eeden - 2011-03-17

Fanie Viljoen is ’n gewilde skrywer van kinder- en jeugromans en is onlangs as naaswenner in Lapa se Jeugroman-kompetsie 2010 aangewys. Hier vertel hy wat hy met sy R15 000 prysgeld gaan maak en spreek sy kommer uit oor die boekeredakteur-kwessie.

Wat beteken die Lapa-prys vir jou?

Dit voel goed om erkenning te ontvang vir my skryfwerk. Om te skryf is maar ’n eensame werk. Die prys herinner my net weer daaraan dat daar iets groter kan kom uit die alleen-ure.

Dink jy die uitgewersbedryf is in gevaar met Media24 wat nou slegs een nasionale boekeredakteur wil aanstel?

Beslis; voortaan sal net een stem gehoor word in dagblaaie se boekresensies. Daardie stem sal die mag hê om boeke met een haal van ’n gifpen te verwoes, of met ’n heuningkwas ’n soet veeg deur die bek te gee. Die opsie wat die nasionale boekeredakteur het om meer opinies te vra sal min, indien ooit, gebruik word. Kinder- en jeugverhale sal seker nou meer as ooit aan die agterspeen suig. Ons het in die verlede wonderlike ondersteuning van Adéle Dempers by Volksblad ontvang . Gaan dit steeds gebeur? Dalk kan Jip meer ingespan word hiervoor?

Waaroor gaan jou roman?

Yadia word onseremonieel by haar ouma gedump in ’n dorpie in Magoebaskloof. Hier kom sy in aanraking met die vreemde seun met die vreemder naam, Poenk. Albei van hulle het ’n geheim. Yadia s’n lê begrawe in haar lyf; Poenk s’n is in die bos. En dit kan dalk net jou lewe verander ...

Waar het die idee vir jou roman/jeugroman ontstaan? Wat was die begin?

Ek wou ’n verhaal skryf wat weer vir jongmense hoop kan gee. Baie van hulle word gekonfronteer met seer en swaarkry. Een so ’n kind het ek gesien by ’n skool in die Kaap – hy het verwese in sy skoolbank gesit en sy broek was vasgemaak met ’n doekspeld. Dink jou net in hoeveel guts dit vat om só na ’n hoërskool toe te gaan.

Jy skryf hoofsaaklik jeug- en tienerromans/-boeke. Het jou kinderjare enigiets hiermee te make? Kan ons ’n volwasse roman in die toekoms verwag?

Ek dink ek skryf nog vir kinders en die jeug omdat ek nog ’n jong hart het. Dalk kom daar later ’n boek vir volwassenes. Vir nou is daar net kortverhale, soos die een in ’n nuwe spanningsbundel van Francois Bloemhof.

Wat gaan jy met jou prysgeld maak?

Dis sakgeld vir ’n kunstoer na Italië in Mei.

Baie skrywers, soos PG du Plessis ook, sê dat die moeilikste ding van skryf is om daad by die woord te voeg en net te sit en skryf. Ervaar jy dit ook so?

Ek skryf baie gedissiplineerd. Dis my werk, maar dit voel soos speel. En wie sal nou daarmee sukkel?

Wat dink jy is die rol van literêre pryse? Wat is die verskil tussen pryse wat voor publikasie en na publikasie toegeken word?

Daar verskyn so min jeugverhale dat dit bykans die enigste manier is om ordentlike boeke uit skrywers te kry. Die Ontvanger verdien meer uit elke boek wat verkoop word as wat uiteindelik in my sak beland. Die literêre pryse dien dus as aansporing.

Watter literêre werke inspireer jou (en maak jou ook so bietjie jaloers)?

Ek geniet Jaco Jacobs se verbeeldingryke boeke vreeslik. Maar ek is nie jaloers op hom nie. Ons is goeie pelle.

Met watter bekende karakter wil jy ’n bottel wyn deel?

Ek sal dalk eerder ’n bottel rooi koeldrank saam met Pippie Langkous in haar boom wil gaan drink.