Hierdie is die LitNet-argief (2006–2012)
Besoek die aktiewe LitNet-platform by www.litnet.co.za

This is the LitNet archive (2006–2012)
Visit the active LitNet platform at www.litnet.co.za


 
Taal | Language > Taaldebat | Language Debate

Amsterdam-tafelronde oor Afrikaans: Rudolf Stehle gesels met Willem Botha


Willem Botha - 2010-05-12

Afrikaans is op 28 Mei vanjaar die onderwerp van ’n tafelronde in Amsterdam. Hierdie eendagkonferensie word deur die NZAV (Nederlands-Zuid-Afrikaanse Vereniging) georganiseer en deur die Nederlandse Taalunie gefinansier. Rudolf Stehle het met Willem Botha gesels oor sy deelname.

Namens wie woon u die konferensie by?

As hoofredakteur en uitvoerende direkteur van die Woordeboek van die Afrikaanse Taal (WAT).

Waarom woon u die konferensie by?

Alhoewel die hooftaak van die WAT is om die Afrikaanse taal in sy wydste omvang te weerspieël, wil ons ook graag ’n breër bydrae lewer. Daarom is ons betrokke by die opleiding van leksikograwe (woordeboekmakers) vir die ander inheemse tale, en ons wil ook ’n bydrae lewer tot die onderrig van Afrikaans op skool. Aangesien die konferensie gemik is op die ondersteuning van projekte rondom Afrikaanstalige onderwys, wil die WAT graag teenwoordig wees.

Wat hoop u om met u bywoning van die konferensie te bereik?

Die WAT beoog ’n projek in 100 voorheen benadeelde Wes-Kaapse skole in samewerking met die Khanya-projek van die Wes-Kaapse Onderwysdepartement. Die Khanya-projek het rekenaargesteunde onderrig vir al die verskillende vakke op laer- en hoërskoolvlak ten doel en honderde skole is reeds met die hulp van borge met rekenaarlokale toegerus. Die WAT se projek in samewerking met Khanya behels die installering van die Elektroniese WAT in die rekenaarlokale van 100 skole. Lesplanne vir die onderrig van Afrikaans met behulp van die elektroniese woordeboek is reeds saamgestel. Onderwysers en leerders moet egter ook opgelei word in die gebruik van die elektroniese woordeboek en die onderwysers moet vertroud gemaak word met die lesplanne wat op die Afrikaans-kurrikulum gebaseer is.

Die Khanya-projekleiers vereis egter borge voordat projekte aangepak kan word, en daar word gehoop dat finansiële steun vir hierdie projek uit die konferensie kan voortvloei.