Hierdie is die LitNet-argief (2006–2012)
Besoek die aktiewe LitNet-platform by www.litnet.co.za

This is the LitNet archive (2006–2012)
Visit the active LitNet platform at www.litnet.co.za


 
Leefstyl | Lifestyle > Expats > Onderhoude | Interviews > Jong expats | Young Expats

Jong expats: Lize Viljoen oor Seoel, Suid-Korea


Lize Viljoen - 2009-12-09

Lize, waar woon jy nou en is die gras wel groener daar?

Ek woon in Seoel, Suid-Korea, en gras is baie skaars hier! Grappies op ’n stokkie, hier is die geleenthede vir werk goed. Daarmee saam gaan stabiliteit, en mens kan lekker huis opsit. Niks vergelyk egter met Suid-Afrika nie. As ek daar kon werk kry, sou ek enige dag wou terug. Ek is wel dankbaar vir die verskillende lewensieninge en anderste soortgeite wat ek elke dag raakloop. Korea is ’n baie stabiele plek, met ’n lang, interessante geskiedenis wat Suid-Afrika s’n soos ’n katspoegie laat lyk. Hier is ook baie ou Koreaanse forte en geskiedkundige geboue om te besoek.

Hoekom het jy Suid-Afrika verlaat? Beplan jy om terug te kom?

Ek het in 2000 die geleentheid gekry om Engels in Taiwan te gee en is so uit die land uit, aanvanklik net vir ’n jaar. Ek het agtergekom dat mens nie weer kan teruggaan en vir so ’n klein salaris werk nadat jy iets beter ondervind het nie. As ek ’n goeie werk kon losslaan, sou ek terug. Die stres van met geweld en misdaad leef na mens agtergekom het dit is nie op ander plekke so erg nie, laat my tog twee keer dink. Ek was in September met vakansie en het die gevoel gekry dat mense op baie vlakke swaar trek.

Vertel ons bietjie meer van jou beroep.

Ek bied Engels as tweede taal aan. Aanvanklik het ek met kindertuinstudente, skoolkinders en ook universiteitstudente gewerk. Op die oomblik bied ek vir volwassenes by Jonsei Universiteit vir Buitelandse Tale klas aan. My studente kom uit “all walks of life” en wissel in ouderdom van twintig tot sestig jaar. Dis baie interessant. My droom is om in die toekoms my eie Engelse skool in Suid-Afrika oop te maak.

Wat van Suid-Afrika laat jou lag en wat laat jou huil?

Suid-Afrikaanse humor is die beste. Ek dink ons lag lekker vir onsself! Die gesegde “Leer om vir jouself te lag, dan het jy altyd iets om oor te lag” is vir my tipies Suid-Afrikaans.

Ek huil baie oor die land en die mense wat ek mis, veral my familie, omdat almal so ver is.



Wat mis jy die meeste van Suid-Afrika?


My familie en vriende, braaivleis en die mooi strande. Ek mis ook die groot ooptes en die mooi sonskyn en blou lug.

Hoe reageer mense as hulle uitvind jy is Suid-Afrikaans?

Dit vat nogal iets om mense te oorreed dat ek van Afrika af kom, aangesien ek wit is. Ek was al so g..vol vir die vraag “Hoekom is jy wit?” dat ek sommer sê die bleikmiddel kom saam met die visum. Dit laat mense gewoonlik twee keer dink.

Waar in die stad/land waar jy tans woon, kuier jy graag – en wat doen jy in jou vrye tyd?

Die woonbuurt waar ek woon, is baie boheems, met mense van alle lande wat hier bly. Hier is ’n restaurant, Indigo, wat lekker kos maak, nice dekor het, en waar mens enige dag deur Westerse mense van Amerika, Kanada, ens omring word. Dit voel baie internasionaal om daar te sit en na die ander mense se gesprekke te luister. In ’n land waar mens nie regtig die taal praat nie, is dit lekker om te verstaan wat mense rondom jou sê.

Jy kan ’n Afrikaanse sanger of band nooi om daar op te tree; wie kies jy?

Ek sou graag die Parlotones wil nooi. Ek hou van hulle musiek en hulle kreatiewe styl. Hier is een van hulle videos op YouTube.

Wat is jou gunsteling-kossoort of -produk wat jy in Korea kan kry wat nie hier beskikbaar is nie?

Kimtsji is ’n soort bygereg wat saam met alles geëet word. Dit word van groenkool, met baie gemmer, rooi pepersous en knoffel gemaak. Die meeste van die kos bevat warm speserye soos rooi peper, en dit vat nogal ’n tyd om daaraan gewoond te raak.

Sou jy Suid-Afrikaners aanmoedig om daar vakansie te hou?

Nie regtig nie. Dis ’n werkersparadys.

Wat is die hoogtepunt van jou verblyf in die buiteland?

Destyds was ek op Paradys-eiland in die suide van die Filippyne. Dis erg mooi daar. Verder sien ek uit na Kersfees in Portland, Amerika, hierdie jaar.

Hoe verskil die werkkultuur in die stad/land waar jy tans woon van dié van Suid-Afrika?

Mense werk lang ure, en kry min vakansie. Vyf dae is hier ’n lang vakansie.

Enige interessante tendense waarvan jy ons wil vertel?

Korea is seker een van die lande waar die meeste konstruksie op ’n konstante basis plaasvind. Onlangs is een van die langste brûe hier voltooi.

Ek het ook vandag in die koerant gelees dat ’n nuwe hoëspoedtrein beplan word tussen die noordweste en die suidweste van Korea. Verder is die plek ook ’n behoorlike betonoerwoud met blokke geboue wat die landskap domineer.

Jy is gestrand op ’n eiland. Jy het drie Suid-Afrikaanse items van die sinkende skip gered. Wat het jy gekies?

Braaivleis, Vyf Rose en melktert.


<< Terug na die Jong expats-blad <<