Hierdie is die LitNet-argief (2006–2012)
Besoek die aktiewe LitNet-platform by www.litnet.co.za

This is the LitNet archive (2006–2012)
Visit the active LitNet platform at www.litnet.co.za


 
Nuwe skryfwerk | New writing > Poësie | Poetry > Afrikaans > Gepubliseerde digters

’n Straat in Delft


Karlien van der Merwe - 2011-08-11

Untitled Document

’n Straat in Delft

Vanuit huisarres
agter tralies slot en grendel
kan ek skielik, onbelemmer
met steë langs
oor wydgegooide luike
of straatlangs
drentel.

Vermeer se Delft-toneel
hang in my prenteraam.
Met wit kwasveë
en spatsels rooi en geel
vang die skilder vas:

klein figure
wat in die gedagte uitdy.
Groei tot lewensgroot.
Teen baksteenrooi en pêrelgrys
straatlangs
klein-doenig bly.

Die magiese bevry.
In dié bewolkte helderheid
verdroom ’n straat in Delft
sy daagliksheid.