Hierdie is die LitNet-argief (2006–2012)
Besoek die aktiewe LitNet-platform by www.litnet.co.za

This is the LitNet archive (2006–2012)
Visit the active LitNet platform at www.litnet.co.za


 
Nuwe skryfwerk | New writing > Poësie | Poetry > Kompetisies | Competitions

Vertaalkompetisie: Vryheid


Estelle Hester - 2011-08-05

(Vertaling van "Vrijheid" deur Marion Bloem)

Vryheid

As vryheid beteken:
dat jy jou bek moet hou
want ek het iets te sê

As vryheid beteken:
dat jy agter tralies sit
en ons sonder vrees leef vir jou,
die vreemdeling met anderse doen en late

As vryheid beteken:
dat die dag van môre
gewetenloos bepaal word deur vandag
en dit vandag saai en sat sal maak

As vryheid beteken: geslote deure en hoe
ek in vryheid op die skerm loer dat alles
in die buurt tog veilig is

As vryheid beteken:
dat ek rustig slaap
omdat die monde
van ander kwaadwillig gesnoer is

As vryheid beteken:
Ek eet wat en wanneer ek wil,
Maar my skille val in die koerant waarin
ander se hongersnood verswyg word

As vryheid beteken: in onkunde leef
hoe ek bevry is,
wat my vry hou,
of wat my daagliks in vryheid vasketting

As vryheid beteken: wag tot ander my
van my ingewortelde vrese bevry

As vryheid my gedagtes salwe
As vryheid om en om en in my dwarrel
maar vir jou is dit steeds duister

As vryheid my beskerm teen jou idees
wat te vreemd en anders is

As vryheid vir my vandag so
vanselfsprekend lyk,
maar niks vir jou beteken

Dan is vryheid munt vir my
en kop-af vir jou
Dan is vryheid wind en willekeurig

Maar dit staan my wel vry
om van my lekkerlyfvryheid - met
wedersydse verdrag natuurlik -
tydelik of ewig
af te staan om jou
van my verstikkende vryheid
te bevry